Treballa fendo clases d’aragonés

En l’A.C. Nogara, las clases las femos voluntarias y voluntarios que adedicamos parte d’o nuesrto tiempo libre a aduyar un poquet a que ista luenga nuestra contine viva. Manimenos, por cada dia, l’aragonés intresa a más y más chent y no adubimos a atender toda la demanda de curso que tenemos.

Ye por ixo que en a zaguer asembleya de l’Asociación se decidió de creyar una bolsa de treballo pa profesorau d’aragonés. As personas trigadas s’encargarían de fer clase d’aragonés en os cursos que no adubisenos a fer o voluntariau.

Si te fa goyo a luenga y t’agana de fer clase, puetz ninviar-nos o tuyo Curriculum Vitae a asociacion@nogara-religada.org dica o 16 d’octubre. Con as personas que cumplan o perfil feremos una bolsa de treballo, pa poder continar ixamplando a nuestra ufierta formativa y levando l’aragonés a totz os puestos an que a chent quiera aprender-lo.

Publicado en Uncategorized | Etiquetado , | Deja un comentario

Nuevos cursos d’aragonés 2016 / 2017

Ya son aquí. Ya puetz apuntar-te a os cursos d’aragonés de Nogará-Religada. Por agora, os horarios son:
– luns: de 19 a 22h (primer grau)
– luns: de 19 a 22h (segundo grau)
– martes: de 19 a 22h (primer grau)
– mierques: de 19 a 22h (primer grau)
– sabados: de 10 a 13h (segundo grau)
Encara que recomendamos de fer-lo presencial, tamién ye a posibilidat de online, y en Lituenigo os viernes de 20 a 22h.
Empecipiarán a primer semana de noviembre, dica chunyo. Puetz inscribir-te-ie por aquí, en asociacion@nogara-religada.org, pasando-te de tardes por A Flama (c/ Mayor 53), u luns, martes, mierques y chueus a partir d’as 19h en a nuestra seu (Pza. Asso, local).
Apunta-te-ie!

14192105_10207570016468121_5475298573634475077_n

 

Publicado en Cursos | Etiquetado | Deja un comentario

Nogará-Religada debant d’a falta d’acción d’o Gubierno de Zaragoza respecto a las midas anunciadas a favor de l’aragonés

Dende Nogará-Religada queremos fer patent l’immobilismo d’o equipe de gubierno d’o Concello de Zaragoza respective a las midas prometidas por o que fa a la protección y difusión d’a luenga aragonesa en a ciudat, un anyo dimpués d’a constitución d’o nuevo gubierno municipal.

Veyemos, un anyo dimpués, como a sensibilidat d’o nuevo equipe de gubierno de Zaragoza en Común (ZeC) enta l’aragonés ha cambiau positivament dimpués d’anyos de desprecio enta iste idioma en a nuestra ciudat por parte d’os y d’as representants municipals.

Manimenos, dimpués d’a ilusión inicial, hemos visto como ista tasament s’ha transformau en feitos, y han estau muit tasas as accions realizadas en favor d’a nuestra chicota luenga en a capital aragonesa, an que confluyen tanto fablants nativas procedents d’atras zonas d’Aragón como nuevas.

Trobamos a faltar una mayor presencia de l’aragonés en os diversos medios de difusión d’actividatz y campanyas d’o concello, y creyemos necesaria una mayor sensibilización y difusión d’a luenga aragonesa por medio de campanyas, actividatz culturals y atras accions ent’a población que no i parla y mesmo desconoixe a suya existencia.

Asinas mesmo, no s’ha realizau garra acción dende o concello pa promover a ensinyanza de l’aragonés en institucions municipals, ni tampoco no s’ha procediu a la rotulación en bilingüe d’as carreras an que pueda realizar-se. Tampoco no entendemos a desaparición d’o concurso de coplas, a on l’aragonés i teneba presencia.

Entendemos a gran cantidat d’afers a tractar en una ciudat tant gran como Zaragoza, pero tamién entendemos que un anyo ye tiempo suficient pa haber-ne realizau un desenrollo minimo.

Dende Nogará-Religada, con tot y con ixo, queremos dar as gracias a l’equipe de gubierno d’a ciudat por levar a o pleno d’o concello a declaración de Zaragoza como ciudat d’uso historico de l’aragonés, que lamentablement fue allí refusada.

Publicado en Comunicaus | Etiquetado , , | Deja un comentario

De vancanzas, l’aragonés no se descansa

Publicado en Actividatz | Etiquetado , , | Deja un comentario

Ya puetz ascuitar as charradas d’as XXIII Chornadas d’as luengas d’Aragón

12936602_10206609672900132_2517443132568828199_n

Entre o 4 y o 10 d’abril, y fendo parte d’o “Abril por l’aragonés”, Nogara fació a XXIII edición d’as Chornadas d’as luengas d’Aragón. En ista edición se facioron diez actividatz an que bi habió charradas, tallers, una exposición, un concierto, y una visita guidada ta l’Alchafaría. A respuesta estió prou buena, emplindo totz os diyas as salas y conseguindo fer vistero que por cada diya bi ha más chent a qui l’intresa l’aragonés.

Beluna d’ixa charradas estioron gravadas ta que, qui no podió estar-ie, pueda disfrutar lo menos d’o que se i charró. Contino penchamos os vinclos ta que puedas descargar-te-las u sentir-las on-line. Recuerda, antimás, que en a nuestra canal de Ivoox, imos penchando de cabo ta quan nuevos audios.

Transmisión familiar de l’aragonés

https://www.ivoox.com/player_ej_11381611_4_1.html?c1=ff6600

Felqueral. A naturaleza d’o Sobrarbe en aragonés

https://www.ivoox.com/player_ej_11382845_4_1.html?c1=ff6600

Os chopos capeceros. Un patrimonio menazau

https://www.ivoox.com/player_ej_11383288_4_1.html?c1=ff6600

Transiberiano y Xordica. Editorials en aragonés

https://www.ivoox.com/player_ej_11394430_4_1.html?c1=ff6600

La Ronda de Boltanya. 25 anyos rondando

https://www.ivoox.com/player_ej_11418665_4_1.html?c1=ff6600

Tierra de barrenaus. 10 anyos dando mal en aragonés

https://www.ivoox.com/player_ej_11418705_4_1.html?c1=ff6600

 

 

Publicado en Chornadas | Etiquetado , , , , , , , | Deja un comentario

25 anyos dando ferrete

Lectura manifiesto

(Texto leyiu en o concierto por os 25 anyos de treballo por l’aragonés que organizó Nogara o pasau 23 d’abril)

Hue aqui somos presents muitas cheneracions, en i habra de güelos, de mais, y fillos. En 25 anyos en i habra de tot, de mayestras y d’alumnos, mentoras y disciplos. Porque en 25 anyos pasan muitas cosas, fet-me caso, muitas. Y a muitas de vusatras d’una u atra traza vos ha pasau una que se clama Nogara.

Nogará naixió en un almario d‘a Casa de Choventut de Casco Viello, y estos 25 anyos son estaus una fayena contina pa salir-ne, no nomás Nogará sino pa fer salir-ne tamién a l’aragonés. Salir d’ixe almario an que nos enzarró tanto a rancia cultura d’elite que negaba l’aragonés, como tamién a cheneralidat d’una modernidat progresista que, más que no queresenos, padeixeba d’un cosmopaletismo deseperanzador, condenando-nos con condescendencia a o folclorismo d’os museus.

Hemos saliu de l’almario pa vivir como lo que queremos estar, aragoneses que quieren vivir y fablar como aragoneses, sin renunciar a la realidat trilingüe d’o país, chunto a o catalán milenario d’Aragón y un castellano que encara que forano s’ha naturalizau. Pero l’aragonés, a lengua que un día se charró dende os callizos más foscos de o lugarón más perdiu dica as cambras más bambosas de l’Alchafería, ye a nuestra delera, a que nos une.

Pa muitos de nusatros ye a traza de reconoixer y recuperar a cultura esmicazada que nos han deixau en herencio a chent gran de casa nuestra, pa atros a traza de recuperar a identidat como pueblo, pa atros acercar-se a la cultura d’a montanya, o sancta sanctorum d’as esencias aragonesas, pa atros conoixer a marabillosa riqueza que suposa una luenga tant rica y tant menospreciada, pa atros continar a tradición de casa suya  an que encara se feba servir a lengua…

En Nogará hemos complegau muita chent de muitos orichens y con muitas motivacions diferents. Nos hemos reuniu de cutio arredol d’una unica meta, vivir en aragonés. Pa ixo hemos aprendiu, y continamos aprendendo, totz en chunto. Por ixo hemos amostrau, ensenyau, aprendiu, difundiu, charrau, discutiu y mesmo pleitiau, pero siempre en aragonés. Por ixo decidiemos d’acercar-nos a las comunidatz de parladors nativos, en viaches, en convivencias, por ixo miremos de fer complegar variedatz dialectals y modelos comuns en os mesmos foros, como a revista O Espiello que en verá a luz de camín un numero especial. Nos esforcemos en fer clases an que a primer cosa que ensenyabanos yera que siempre caldría amillorar lo que aprendebanos, conoixendo as variedatz fabladas y l’aragonés historico, contrastando as vivencias y percepcions de muitos sin creyer-se nunca en posesión d’a verdat.

Habretz visto a Nogará en a carrera apegando cartels de carreras en aragonés, reivindicando a oficialidat, a escuela en aragonés, medios publicos en aragonés, acceptación d’a historia d’a luenga, seriosidat en os estudios, respeto a qui ha mantenida viva a lengua, demandando colaboración entre qui nos creyemos o futuro d’esta, colaboración y comprensión.

Nos habretz visto empentar, una y atra vegada, iniciativas que nos levasen chuntos enta o futuro,en os 90, a prencipios de o sieglo XXI an que a revisión de os modelos de normativización y normalización no trencase a unidat d’o movimiento. En estos zaguers 11 anyos o nuestro camín ye estau reforzar a compleganza de todas as posturas, y ixe camín no ye estau fácil.

Encara no lo hemos rematau, encara somos fendo-lo y siempre que tengamos opción querremos fer-lo chuntas.

Este zaguer anyo se nos ha ubierto a posibilidat de contar con una verdadera politica lingüistica, encara que no nos fagamos ilusions, mesmo con ixa situación l’aragonés habrá de luitar contra os argumentos utilitaristas, despreciadors u dreitament contrarios a la dignificación d’a nuestra cultura. A sociedat aragonesa no ye encara madura pa entender o nuestro treballo, o de Nogará y o de totz os que luitan por a lengua nuestra.

Dimpués de quasi un anyo de reconoiximiento de o terreno, de trobar-nos unatra vegada totz en a fayena, pareix que o camín de a politica lingüistica apunta enta o treballo de conchunta.

Nusatros, dende Nogará, continaremos achugando por ixa unidat d’acción, encara que siempre respentando as diferents realidatz que vivimos, dende Ribagorza dica o Viello Aragón, dende Sobrarbe dica as sierras d’o Sud, dende a Ribera dica Moncayo, dende os viellos dica los ninos, dende os rurals dica os urbanos.

Y prou que recreando y alimentando l’unico que fa que una luenga siga viva, a comunidat de parladors que la emplegan. Por ixo Nogará continará fendo clases, fendo borina, motivando a qui charra, fendo ligarzas entre a chent, empentando a que s’escriba, a que se fagan prochectos en aragonés y a que qualsiquier aragonés los faga suyos. Si a politica lingüistica amillora en o país, Nogará s’habrá d’adaptar a los nuevos tiempos, aportando-ie lo que calga, pa que os ninos aprendan de sus pais, tíos y vecinos, d’a televisión, d’a radio, d’a prensa y d’a escuela y que si contina Nogará 25 anyos más siga con a unica fin de que l’aragonés, esta lengua milenaria, contine viva mil anyos más.

Muitas gracias por a vuestra presencia, que nos da toda a rasmia y a motivación necesaria. Muitas gracias. L’ARAGONÉS YE VIVO, L’ARAGONÉS YE NUESTRO, RESISTE, RESISTE. ENTALTO L’ARAGONÉS. VIVA L’ARAGONÉS.

Publicado en Comunicaus | Etiquetado , , | Deja un comentario

Abril por l’aragonés

abrilporlaragones25 anyos de treballo por l’aragonés s’han de celebrar como cal. Por ixo en iste curso hemos quiesto ixamplar a programación de totz os anyos, fendo que en o mes d’abril, l’aragonés siga lo protagonista.

As chornadas d’as luengas d’Aragón, que fan en 2016 a suya XXIII edición, contarán iste anyo con un total de 10 actividatz, an que antimás de charradas, bi habrá un concierto acustico y una visita guidada por l’Alchafaría. A programación completa la puetz leyer en o cartel u más abaixo. Entre o 4 y o 13, cada diya nos trobaremos ta charrar, debatir, y proposar arredol d’o nuestro patrimonio lingüistico.

A tot estrús, a Chornada esportiva por un Aragón trilingüe, cambea iste anyo d’estación ta fer-se en primavera. O 16 d’abril o parque Bruil de Zaragoza acullirá ista chornada an que esfenderemos as nuestras lenguas, chugando y fendo esporte. L’acto central será un cross por o parque y as riberas d’a Uerva y l’Ebro. T’apuntar-se-ie, cal escribir a esfendemosasluengas@gmail.com.

Entre 2002 y 2012, l’Asociación Cultural Nogara – Religada publicó a revista d’actualidat de raso en aragonés O Espiello. Una publicación unica en o suyo chenero y an que podiemos leyer articlos, noticias, relatos, … d’una ripa d’autors y autoras que implioron as suyas pachinas. En iste cabo d’anyo, queremos fer-ne alcordanza con un numer especial an que repasamos muitos aspectos d’a nuestra lengua.

chornadasTot lo mes continaremos tastando, prou que sí, a biera conmemorativa Religada, que presentemos con un concierto y un acto an que se fació conoixer a etiqueta que ilustra as nuevas zamarretas de l’asociación. Todas dos, bieras y zamarretas, las podretz trobar en a botiga de Nogara y en totz os actos d’iste “Abril en aragonés”.

Remataremos o mes en una calendata prou especial. O 23 d’abril, diya d’Aragón, o Centro Civico Delicias acullirá un concierto an que tos convidamos a todas y totz a celebrar con nusatras istos 25 anyos de faina. A las 19:00 La Ronda de Boltaña nos trayerá a suya mosica sobrarbenca, con as nuevas cantas d’o suyo disco “La huella que el tiempo deja”, y os clasicos que tanto hemos cantau totz y todas. Comando Cucaracha continará con a borina con a suya mosica mestiza an que barracha folk, rock, reggae, ska y tot lo que les agane. O concierto rematará con Prau, qui tornan t’os scenarios dimpués de muito tiempo de silencio, plens de ganas de fer-nos blincar y puet estar que con bella sorpresa.

conciertoEn totz istos meses, dende aquella devantadera d’o curso en setiembre, hemos iu animando-tos a participar en a campanya de #Nogara25anyos. Todas ixas fotos, videos y mensaches que hetz compartiu con nusatras, ferán parte d’un video que se presentará en ixa mesma chornada d’o 23 d’abril.

Asinas que ya sabes. Pilla agora mesmo a tuya achenda, ubri-la por o mes d’abril, y empli-la de cultura!

 

 

Programa d’as XXIII Chornadas d’as luengas d’Aragón:

Lunes 4 d’abril: Transmisión familiar de l’aragonés en arias de parla castellana.

Martes 5 d’abril: 19:00 Felqueral: a naturaleza d’o Sobrarbe en aragonés.
21:00 Devantadera exposición fotografica en A Flama (C / Mayor, 53)

Miercols 6 d’abril: Os chopos capeceros. Un patrimonio menazau.

Chueves 7 d’abril: Editorials en aragonés: Transiberiano y Xordica.

Viernes 8 d’abril: A ronda de Boltanya: 25 anyos rondando.

Sabado 9 d’abril: 21:00 Vía Láctea. C / Dr. Palomar. Concierto “Llibres. Batalles, Cançons” con Xavi Sarrià y Feliu Ventura.

Domingo 10 d’abril. 12:00 Visita a l’Alchafaría en aragonés.

Lunes 11 d’abril. Tierra de barrenaus. 10 anyos dando mal en aragonés.

Martes 12 d’abril. Os cudiaus aintro d’o mundo de l’aragonés.

Si no mete lo contrario, todas as actividatz se fan a las 19:00 en o Centro Joaquín Roncal.

Publicado en Actividatz, Chornadas | Etiquetado , , , , , , , , , | Deja un comentario