Qui somos?

Nogara ye una asociación, naixida de Zaragoza en 1991, que esfiende y amuestra la luenga aragonesa. A nuestra actividat principal ye la de fer clases d’aragonés endrezadas más que más a personas adultas de qualsiquier edat.

L’Asociación Cultural Nogara – Religada esfiende que as personas que charran aragonés puedan tener guarenciaus os mesmos dreitos que as personas que nomás charran castellano. Ta ello, luitamos totz os diyas por a oficialidat d’a luenga y por a suya normalización en a vida publica: administración, medios de comunicación, amostranza, etc…

L’aragonés ye a luenga más menazada d’Europa y, probablement, a venient en desapareixer sino femos cosa. Por ixo, en Nogara hemos apostau, no nomás por a esfensa d’os dreitos d’as personas que charran aragonés, sino por ixamplar o numer de fablants, fendo cursos ta qui quiera aprender a nuestra luenga. Creyemos que ye una faina que le pertoca a l’administración, pero debant d’a suya pasividat, no podemos permitir-nos estar-nos sin fer cosa.

As luengas nomás s’aprenden y perviven charrando-las. Por ixo l’Asociación Cultural Nogara-Religada apuesta por a Socialización d’a luenga dende o primer diya de clase. Queremos que Nogara no siga simplament una escuela. QUeremos que siga un puesto a on que poder vivir a luenga. Por ixo, organizamos toda mena d’actividatz a on que poder fer servir ixa luenga: viaches, charradas, tallers, fiestas, etc… Antimás tenemos biblioteca de consulta y d’ampre ta qui quiera fer-la servir. A nuestra siede y a nuestra asociación siempre ye ubierta a propuestas y a qui quiera emplegar-la ta esfender a luenga.